Vil innføra turistskatt i Hardanger

Hardanger tek no første steg mot å innføra turistskatt. Eit felles forslag skal utarbeidast før saka kjem til behandling i dei enkelte kommunane.

Turistskatt: Hardanger kan bli blant dei første regionane i landet som tek i bruk turistskatt. No skal kommunane gå saman om eit felles forslag før saka kjem til politisk behandling lokalt.

Hardangerrådet har gitt næringssjefane i kommunane i oppdrag å utarbeida eit felles saksframlegg om turistskatt. Dette skal brukast som grunnlag når kvar enkelt kommune skal ta stilling til ordninga.

Saka vart handsama i Hardangerrådet nyleg, der det også vart vedteke ei felles høyringsuttale til den nye forskrifta om overnattingsavgift. Uttalen blir sendt til Nærings- og fiskeridepartementet.

Vil unngå forskjellsbehandling

Rådet ber samtidig om at innføringa av den nye besøksbidragslova blir samordna med reglane for cruiseavgift.

– Dette for å unngå ei urettvis ulik handsaming av ulike turistar til området, heiter det i tillegget som no blir sendt inn.

Opnar for avgift på overnatting

Stortinget vedtok i juni i fjor å opna for turistskatt, eller besøksavgift. Ordninga gjer det mogleg for kommunar med mykje turisme å leggja på ein avgift på opptil 3 prosent på overnatting.

Campingturistar er føreslått skjerma frå avgifta, medan hotell, utleige og cruiseturisme kan bli omfatta.

Kan bli cruiseavgift

I tillegg har departementet føreslått at kommunar kan innføra ein eigen avgift på cruisepassasjerar. Denne kan vera på opptil 100 kroner per passasjer for kvart døgn skipet ligg i hamn, eller for passasjerar som går i land.

No skal saka vidare til politisk behandling i dei enkelte kommunane i Hardanger.